繼超長「單行」鍵盤、「茶杯」鍵盤及「真．鍵帽」後，日本Google再以旗下輸入法Gboard推出惡搞產品，今次係一款採用莫比烏斯環(Möbius strip)結構嘅正反同面鍵盤，標榜任何角度都能夠打字，同時支援多人同時使用，仲有RGB燈效添！

日本Google表示，由於佢哋注意到一般鍵盤只得一面，翻轉後就無法打字，於是忽發奇想，以正反同面嘅莫比烏斯環為靈感，設計出一款任何角度都能夠打字嘅特別鍵盤。據介紹，鍵盤總共由26個模組拼砌而成，每個模組分別有8個按鍵，通過扭轉結構連接在一起，形成一個不分內外嘅「雙面」鍵盤，更可以加入RGB燈光效果，重量大約20.8個冬甩左右，不過就唔支援無線連接，需要接上USB-C電線使用。

同過往嘅創意產品一樣，日本Google並冇計劃量產發售，不過就好熱心咁將製作教學、材料清單、電路設計圖等資料放晒上GiuHub，等有興趣嘅朋友可以跟住嚟DIY。