無論你係玩《Pokémon TCG Pocket》，定係近來玩緊《Monster Hunter: Wild》、《33號遠征隊》，反正對唔少人黎講，打機已經係日常生活中不可或缺嘅一部份。不過根據一個國際研究，原來打機時間長短係同你個樣有關，準確啲黎講，就係靚仔原來唔打機嘅！就算打，佢哋打嘅時間都比其他人要短！

話說一個集合美國、英國、中國及香港大學學者嘅研究團體，早前利用美國「全國青少年至成人健康追踪調查」資料庫嘅數據，試圖了解「外表」與「打機時間」之間嘅關係。佢哋首先發現美國年輕人平均會花2.6%非睡眠時間於打機之上，而成年人則花約2.7%，兩者相差不大。但進一步分析後，就發現不論係年青人定係成年人，只要佢哋嘅外表有足夠吸引力，佢哋就更有可能完全唔打機；就算真係打機都好，佢哋打機嘅時間亦遠比外表唔吸引嘅人少。所以結論就係：靚仔打少啲機。

研究團隊亦對背後原因作出推測。佢哋指出數據顯示，外表吸引嘅人係擁有更多親密朋友，換言之佢哋嘅時間除咗用黎打機，仲可以做好多其他事，所以佢哋將時間花於打機上嘅機會成本，會比外表唔吸引人嘅高得多，從而導致佢哋打機時間較少，甚至乾脆就唔打機。

值得一提嘅係，研究強調係「靚仔唔打機」，而唔係「唔打機嘅就係靚仔」。所以就算你唔打機你都唔好笑得咁開心呀！

資料來源：Looks and Gaming: Who and Why?