隨住AI越黎越普及，相信唔少人都已經有使用AI嘅習慣，由過往嘅「唔識問Google」變成「唔識問AI」，AI於部份職場中甚至已經係必需品，想避都避唔到。據外媒引述多個外國研究更發現，現代打工作似乎陷入「冇用AI嘅扮有用，有用嘅人又扮冇用」嘅矛盾狀況，繼而產生所謂嘅「AI焦慮」（AI-nxiety）。

圖片：Pixabay

科技人材招募公司Howdy.com日前公佈一個關於美國打工仔使用AI嘅大型調整結果。調查發現有75%人會於工作時使用AI，而其中嘅50%係因為公司要求或規定而使用、25%人係自行選用AI輔助工作；而喺有用AI嘅人入面，近六成（59%）每日都至少用一次，可見AI已成現代職場不能或缺嘅工具。

但即使AI相當普及、絕大部份人（84%）亦認為AI能夠提升工作效率，AI同時亦帶來新問題。有22%人認為佢哋被逼於唔肯定應唔應用AI，或者AI究竟幫唔幫到手嘅情況下使用AI，因而感到有壓力；亦有三份一打工仔表示學習使用AI，以及覆檢AI生成出黎嘅嘢所花費嘅時間，其實同佢哋自己做差唔多。結果就係有16%人坦言自己於職場中扮用AI，以討好公司或上司。而據安永（EY）於2023年進行嘅另一項調查，有超過三份二人害怕自己唔識用AI的話升遷會受阻。

圖片：Pixabay

但你又唔好以為呢種焦慮只係存在未適應使用AI嘅打工仔身上喎！另一項調查發現，有用AI嘅人其實都有另一種壓力。據Slack於去年10月進行嘅Workforce Index調查發現，17,000名受訪者中有近半（48%）因為怕被覺得係無能力、偷懶，而唔敢向上司坦白自己有用AI輔助工作。

換言之，目前打工仔似乎處於一個「用唔用AI都有壓力」嘅局面。Howdy.com嘅CEO Jacqueline Samira指出，作為打工仔應該要對學習、使用AI持有開放態度；同時公司亦需要與員工有良好、透明嘅溝通，清楚告訴員工究竟咩情況下應該或需要用AI。另一邊廂，數據安全公司Forcepoint嘅首席數據策略長Ronan Murphy就指出，好多時唔係公司唔想同員工溝通，而係管理層自己都唔知AI發展會點樣影響公司，所以無辦法對員工作出明確指引。

資料來源：The Register、Howdy.com