對於鍾意去日本嘅人黎講，應該唔會對俗稱「西瓜卡」嘅SUICA交通卡感到陌生，甚至提起個名你都諗得起佢上面隻吉祥物企鵝係咩名。不過隨住SUICA於明年步入25週年，JR東日本宣佈會推出新嘅卡片設計，而陪伴大家於過去廿幾年走遍日本嘅企鵝亦即將畢業。

據日本《ITMedia》報導，JR東日本近日宣佈「SUICA企鵝」將會於明年底畢業，未來嘅SUICA將會換上一位符合新品牌形象嘅「代言人」。據報JR東日本打算於明年秋天大幅擴大手機應用程式「Mobile SUICA」嘅功能，包括加入支付代碼等，令SUICA能覆蓋更多日常使用場景。亦因為咁，JR東日本打算推出一個更適合嘅新「代言人」，以取代SUICA企鵝嘅位置。

圖片：ITMedia

SUICA企鵝由日本插畫家「坂崎千春」設計，於SUICA在2001年推出之時就已經出現於卡片之上。於畢業消息公佈之後，「坂崎千春」亦發文多謝日本大眾對於SUICA企鵝多年黎嘅支持：「Suica企鵝能陪伴大家走過這25年漫長歲月，我感到無比幸福。最後這一年也將全力以赴。衷心感謝所有支持我的朋友們。」

資料來源：ITMedia