以後有煩惱想搵大師指點迷津，迎接你嘅分分鐘唔係一個機械人！日本京都大學最近發布一款名為「Buddharoid」嘅AI機械人僧侶，呢位充滿未來感嘅「高僧」唔單止識得雙手合十，仲熟讀大量佛教經典，能夠運用佛教智慧解答信眾嘅人生難題。

據日媒報導，Buddharoid由京都大學Seiji Kumagai教授團隊及AI新創公司Teraverse共同開發。團隊採用咗中國機械人公司宇樹科技嘅通用機械人Unitree G1作為驅體，能夠作出雙手合十、鞠躬等擬人動作。至於「大腦」方面，Buddharoid搭載咗一個名為BuddhaBot-Plus嘅生成式AI系統。呢個系統係以ChatGPT為基礎，並經過大量佛教經典訓練，令佢可以好似真正嘅僧侶，解答各種個人煩惱與難題，為大眾提供心靈輔導。

研究團隊表示，佢哋推出AI機械人僧侶並唔係為咗搞噱頭（Gimmick），而係想藉此吸引更多年輕人接觸佛教，同埋應對日本寺廟「後繼無人」嘅問題。事關目前日本正面臨人口減少同宗教信仰衰落嘅雙重打擊，預計去到2040年，大約有3成佛寺將會消失，再加上人口老化問題嚴重，令鄉郊地區嘅寺廟難以搵到接班人維持日常運作。