早前我哋報導過，迪士尼樂園計劃引入機票式嘅「動態定價」，亦即每個人於不同時段買入場券會見到唔同價錢。而近日又有報導指，Sony亦正於PS Store上測試緊類似嘅定價方式。雖然目前嘅測試主要在於折扣幅度，但考慮到講緊「罪大滔天」嘅Sony，將來有一日真係出現「高峰價格」（即係越多人買就越貴）似乎都唔係難以想像？

近日如《The Verge》及《Mashable》等多間外媒都引述追蹤全球各地PS Store遊戲售價嘅網站「PSPrices」嘅報導，指出Sony正在為PS Store上嘅遊戲進行大規模「動態價格」測試，而且測試嘅規模越黎越大，由去年11月時包含30個地區共50隻Game，到近日已經擴展到68個地區（日本及美國不在此列）超過130隻Game，當中更包括《God of War Ragnarök》、《Marvel's Spider-Man 2》、《HELLDIVERS 2》等自家獨佔大作。

值得留意嘅係，目前Sony測試緊嘅其實係「動態折扣」，換言之唔同地區嘅人去PS Store上買同一隻Game，會有唔同嘅折扣，平均折扣幅度為5%至18%不等。但同時亦有個別玩家於2月促銷時，收到《HELLDIVERS 2》嘅56%折扣優惠（同期正常優惠為25%），顯示Sony亦有測試以玩家為單位、更細致嘅動態定價方式。

圖片：截圖自PSPrices.com

由於目前Sony只係測試緊折扣幅度，換言之「大家買平啲，只係人哋可以再平啲」，所以目前嘅「動態定價」測試並無引起太大反感。但大家要知道「動態定價」嘅另一面就係「高峰定價」（Surge Pricing），亦即係好似機票酒店咁，旺季多人搶就會越黎越貴。萬一將來Sony向呢個方向發展，咁遇到大作時玩家就可能要付出更多錢先可以買到Game。

到目前為止，Sony都無公開承認或否認「動態定價」測試，當然亦唔會進一步解釋具體係點運作、會唔會成為PS Store長期功能等。所以都要慢慢等待事情繼續發展，先可以知道對玩家們嘅影響有幾大啦。

資料來源：PSPrices.com