拈花惹草是常態？為你介紹「柯立芝效應」

文：MenClub 魏文青　　
POSTED ON 10 Jun 2018

所謂再鋒利嘅刀，都有生鏽嘅一日；咁再轟烈嘅愛，做得多又係咪一定會悶呢？悶，又係咪一定要出去花拈花惹草呢？要知道答案，首先你就要暸解一下由內分泌學家Frank A. Beach於1955年提出，以美國第三十任總統柯立芝(Calvin Coolidge)及其太太嘅一番對話而命名嘅「柯立芝效應」。

相傳個故事係咁嘅：某日Coolidge總統同夫人Grace分頭參觀一個農場，期間夫人見到一隻雞不停地與場中母雞交配，於是就問隨行人員隻雞係咪成日都係咁，隨行人員回答：隻雞一日做幾廿次。於是夫人就打趣說，當總統先生到達時，要將呢隻雞嘅故事講佢知。如是者Coolidge總統到埗時又真係有人同佢講，聽完之後總統就問：隻公雞係同同一隻母雞交配？隨行人員回答：唔係，次次都唔同雞。於是總統先生又叫佢將個故仔話返畀總統夫人知。

呢個少少咸多多趣嘅笑話，背後其實係指於一夫多妻制下，雄性即使有穩定交配對象，但只要有新嘅雌性出現，雄性就會對其產生更高嘅意願；講白啲，就係「未食過嘅，總係好過食過嘅」。學者對於此效應出現嘅原因各有解釋，但如果以人嘅角度去睇，主要係同多巴胺(Dopamine)嘅分泌有關。多巴胺係主宰人體感到「快樂」嘅賀爾蒙之一，而影響多巴胺分泌量嘅其中一個就係「新鮮感」，越新鮮多巴胺分泌就越多，你個人就越感到開心。但當一對情侶過於習慣對方，「新鮮感」不再，多巴胺分泌減少，自然感覺就會變淡，亦即係子華神所講嘅「你對我已經唔係好似以前咁」。有趣嘅係當有新鮮對象出現，大家體內多巴胺嘅分泌又會多返，貪新鮮就係咁黎啦。

再簡單啲黎講，「柯立芝效應」係假定人類(不論男女)，都一定會貪新忘舊，甚至到處留情。但當然，現代社會嘅道德標準係唔容許大家咁做，兩個人喺埋一齊亦唔應該只談快感，咁又可以點算？其實一切都在於「新鮮感」！以性愛為例，如果年年月月都係同樣嘅步驟、同樣嘅地方，係人都悶啦？其實雙方都可以喺溝通過後加入新意，例如簡單地試下新姿勢、換下地方時間，可能已經好新鮮。更甚者可以試下加入情趣用品、性愛玩具，又或輕量BDSM等增添變化，令性愛不再成為例行公事。其實講到尾，一段關係(那怕係「性關係」)，都係需要雙方合力經營，過份大安旨意真係唔係好事黎架。