女人點諗我唔知，但男人就好少可會接受到女方出去「偷食」，而當中最接受唔到嘅，好有可能就係「自己嘅女人同另一個男人瞓過」呢件事。不過根據外國嘅一個研究，原來有近一半曾經試過偷食嘅人，都冇同偷食對象做過愛！換言之呢一半人真係齋偷唔食！

圖片：《作家的謊言》

根據刊登於《Journal of Sex & Marital Therapy》上嘅一個最新研究，訪問咗495個平均年齡為20歲、88%為異性戀嘅成年人後得知，原來只有53%偷情人士會與偷情對象做愛，就算只係「口部動作」或者「互相安慰」嘅人數都只係分別有46%及54%，相反親吻 (87%) 及 親密擁抱 (73%) 嘅數字就高得多，換言之有好一部份人就算偷食都係「柏拉圖式偷食」，以現代標準黎講堪稱「發乎情止乎禮」。

另外調查亦發現偷食關係嘅維持時間比想像中要短，男性受訪者偷情關係平均只有75日，女性更只有53日。

圖片：《Knock Knock》

呢個結果亦再次顯示，性生活不滿足並非大家會出去偷食嘅主要原因，反而缺乏來自正印嘅愛及關心先係。當然，今次研究對象主要為廿歲出頭嘅年輕男女，佢哋嘅心態行為都與更成熟嘅男女有所不同。但當最血氣方剛、對性最好奇嘅少年主要都唔係為咗性先偷食，年紀更大嘅受訪者就更應該有其他理由啦。