打機係絕大部份男人嘅愛好，好多人打機可以打到廢寢忘餐，但你又會唔會打到有愛都唔做呢？根據美國一個調查，就發現打機係令到美國年輕男生做少咗好多愛嘅主因。

是次調查嘅背景，係另一個研究發現2016-2018嘅兩年間，美國年輕男性 (18-24歲) 嘅「性愛不活躍度」由2000-2002年嘅18.9%，急升到30.9% (女性同期數字由15.1%升到19.1%)，換言之越黎越多年輕美國男性唔做愛。咁當然年輕人做唔做愛就冇話好定壞，但兩位社會學家就希望搵出「性愛不活躍度」急升嘅原因，於是由用咗密芝根大學自1968年開始做嘅「Panel Study of Income Dynamics」中收集嘅數據，分析不同年代年輕人嘅行為變化。

結果就發現，飲少咗酒係美國年輕女生做少咗愛嘅主因，「唯有這個理由能解釋女生 (做愛) 數字下跌」。而男生方面，雖然飲少咗酒都有關係，但「打多咗機」，以及「更偏向與父母同住」亦係令美國年輕男生做少咗愛嘅原因，換言之有好一部份男仔係因為要打機所以唔做愛——但當然，都有啲人係好似我咁，打機做愛都係玩單人遊戲嘅。