疫情持續一年，全世界所有人嘅生活都直接或間接受到影響，例如過往曾經有不同研究指因為疫情 (及各地政府嘅封城措施) 影響，人們嘅性愛次數都大減。不過根據配對網站eharmony做嘅調查，原來唔少人嘅性愛次數不減反升，更重要嘅係就連性愛質素都有所提升——不過主要係男士咁諗啫。

圖片：截圖自eHarmony

eHarmony最新公佈「2021快樂指數研究」，搵黎2,000名受訪者，問下佢哋2020年各方面過得開唔開心，其中就有一部份係與性生活有關。調查發現，有39%受訪者指2020年嘅性愛質素變得更好，但如果以性別區分，就係50%男士認為性愛質素提升，而女士就只有29%有同感。

據《New York Post》引述關係治療師Nedra Glover Tawwab指，男女雙方嘅數據差別，好可能係在於「質素提升」嘅定義不同。佢話對於好多男士黎講，「次數」同「質素」係掛勾嘅，所以做得越多 (45%男士表示2020年做多咗愛) 就代表越好；但對女士黎講就唔同講法，所以就唔太覺得質素提升。

話雖如此，但調查同樣發現有73%男士及71%女士表示，非常感恩於疫情期間有個伴侶喺身邊，更有58%人表示疫情令佢與伴侶之間嘅關係更加緊密，亦即係話雖然兩性對於性愛質素有唔同睇法，但感情生活上大家都係滿足嘅。