之前都講過N次疫情對對於地球人性生活嘅影響——一句講哂就係做少咗愛啦——但根據知名安全套品牌Durex嘅數據，隨住疫苗出現、社交生活漸漸回復正常，大家做愛次數似乎都火速回升！

據Durex最新公佈嘅銷售數字，今年3月尾到4月尾四個星期內，Durex於美國嘅銷售額為3700萬美金，比起2020年同期急升23.4%，而據Durex母公司Reckitt集團嘅CEO Laxman Narasimhan指，銷售數字並非只於美國回升，多個開始放鬆限制人群措施嘅地區嘅Durex銷售數字同樣有改善，同時消毒產品如Dettol (滴露)、傷風感冒藥物如Strepsils (使立消)等嘅銷量就開始下跌，似乎標示住大家嘅生活開始回復正常。

值得留意嘅係，雖然安全套銷量數字比起疫情期間要好，但安全套本身嘅銷量於疫情開始前就已經年年下跌，主要係面對事後丸等其他避孕方法嘅競爭，以及青少年人口下跌、社交媒體興起 (所以啲人唔做愛) 等原因。