香港性教育一向被人批評落後兼保守，學校只會教大家身體結構以及各種性病等皮毛知識，令一眾好奇少男少女只好上網尋求「課外教學」，瀏覽各種良秀不齊嘅成人網站，喺冇專業人士指導下分分鐘學埋一堆錯誤觀念，將剪輯效果當成真實情況。而一向「走得前」嘅挪威，當地公營電視台NRK近日就推出由專家編製而成嘅「性愛指南」，以多對同性及異性戀情侶，示範多達60種性愛體位，隨即引起全國熱議。

根據NRK說明，呢份指南由助產士、性學家、醫生及治療師編製而成，除咗常見嘅體位之外，大家亦可以搵到長者、孕婦以及背痛或膝痛患者嘅合適體位。全部體位均由真實情侶示範，而且拍攝過程只係擺Pose做樣，並無真正「插入」。

雖然份指南相當具教育意義，亦談不上色情，但據dailymail報導，篇指南從發布至今共收到至少97宗投訴，指NRK作為公營廣播機構，喺性話題上應該保持中立，認為啲相有冒犯成份。主編Reidar Kristiansen就表示當佢決定出呢篇指南嗰時已經預咗有人會批評，但相信指南對每個人都相當有用，發布後頭五日已經有850,000人觀看指南。如果有一日RTHK或BBC等公共廣播機構都出性愛指南，又會唔會被人鬧到飛起呢？

資料來源：NRK、dailymail