中國南通大學嘅一班科學家成功研發利用磁力加熱男性「蛋蛋」嘅避孕方法，並且已經於白老鼠身上試行成功，將來或者有望成為男士們嘅避孕選擇。

呢個「蛋蛋加熱法」實際上係先將納米磁石注射入白老鼠身上，然後研究人員利用更大嘅磁石，將啲納米磁石引導去白老鼠嘅睪丸位置，再對該位置發放磁力場，然後啲納米磁石就會開始加熱，並抑制睪丸製造精子。研究顯示加熱之後，7日之內白老鼠嘅精液中都冇任何精子。

雖然「加熱蛋蛋」再加「中國研發」拍埋一齊好似好得人驚，但據研究報告指，其實只係需要將蛋蛋加熱到40度左右，就已經能夠獲得短期避孕效果，比起其他同類避孕方法要加熱至更高溫度可能造成燒傷、又或要直接將磁性物質注射入蛋蛋之中已經安全得多。

不過，呢個「蛋蛋加熱法」都有其不足之處。由於注射嘅納米磁石能夠被人體分解，所以有效期大概只係數星期。實際上，於白老鼠實驗發現，去到注射納米磁石60日後，白老鼠嘅精子製造能力就已經回復正常——即係如果你當係「絕育方法」佢就唔Work架啦，但如果你係想短期內減少嗰0.01mm距離，佢就可能幫到你。

資料來源：Magnetic Testis Targeting and Magnetic Hyperthermia for Noninvasive, Controllable Male Contraception via Intravenous Administration