俗語有云：十個男人九個滾，剩返一個仲諗緊。唔少人都認為「多情」就係男人嘅天性，如果撇除道德規範，所有男人都會不停溝女。但呢個世界上又真係有啲男人能夠從一而終，對身邊嘅伴侶一心一意，咁究竟「專一嘅男人」同「不忠嘅男人」有咩具體分別？據一個最新嘅研究指，答案可能喺個腦部活動到。

兩位美國德州大學兩位心理學研究員早前做咗個研究，搵黎20名成年異性戀男子，其中一半男性係從未偷食、亦從未處於「開放性關係 (Open Relationship)、性伴侶人數低於平均，而且自稱「甚少對伴侶以外女性有性幻想」 嘅「高度專一男」；另一半就係既試過偷食、又試過「開放性關係」、性伴侶人數高於平均、而且鍾意「多P」嘅「高度不忠男」，要求佢哋觀看與「性」相關 (例如做愛) 及與「浪漫」相關 (例如擁抱) 嘅圖片，然後分析佢哋嘅腦部活動。

結果發現，無論係睇性相關或者浪漫相關嘅圖片，「高度專一男」嘅腦部活動都係集中於簡單嘅「獎勵部份」，簡單啲黎講就即係睇兩種圖佢哋都覺得開心；但「高度不忠男」面對浪漫照片時，更傾向出現「認知系統」嘅活動，亦即係要「諗」。換言之對「不忠男」黎講，「浪漫」係一個需要學習與分析嘅概念。

研究指，呢種腦部活動嘅不同，可能就係部份男人不忠嘅原因。不過由於研究本身並無顯示因果關係，所以亦有可能係「不忠男訓練到自己個腦面對浪漫照時要諗」，腦部活動嘅不同就成為結果。但無論點都好，似乎都證明人腦活動方式係會影響佢哋嘅「求偶方式」。

資料來源：Differences in Neural Response to Romantic Stimuli in Monogamous and Non-Monogamous Men