喺多位富商都先後以民用太空船進行太空旅行之後，或者有唔少人都期待緊太空旅行變得更為普及、甚至可以去到更加遠嘅地方。但喺呢啲成為現實之前，其實都仲有好多技術問題需要解決，而且因為面對民間，更有一啲專業太空任務唔會遇到嘅問題，例如在太空無重力下如何做愛，就成為近日嘅一個熱話。

圖片：Syfy劇集《The Expanse》預告

據NASA嘅官方說法，截之目前為止都冇人類曾於太空無重力環境下進行過性愛活動，太空人們亦會刻意迴避相關問題，咁基於之前嘅所有太空人都係有任務在身，呢個說法似乎都講得通。但假若未來民間太空旅行變得更普遍，又或者係有朝一日能夠進行穿越星際嘅長途旅行，似乎就無法避免有旅客嘗試於太空中激烈碰撞。另一方面，性愛 (不論係單人定雙人活動) 都有助維持身心平衡，亦係人類嘅基本權利，專業太空人為咗任務而「禁慾」幾個月或者可以接受，但如果係更長時間嘅任務，似乎就有啲唔道德。

圖片：Columbia Pictures 電影《Passengers》

所以，無重力性愛將係人類太空探索中必要面對嘅問題之一，而要解決佢就先要理解太空環境對於人體嘅影響。首先，根據過往太空任務嘅結果，太空人都表示上到太空後性欲會降低，據前NASA高級健康顧問Saralyn Mark估計，係因為無重力環境，以及快速圍住地球轉 (約90分鐘轉一圈) 而打亂生理時鐘，影響內分泌繼而影響埋性欲。不過根據德國太空人Ulrich Walter指，喺太空生活幾個星期後身體就會適應，性欲亦會重現。

唔少人都會擔心無重力或會令男性身體無法集中於下體，簡單黎講就即係不能勃起，但Saralyn Mark就表示體內活動其實冇影響，反而係女性嘅分泌物，由於無重力嘅關係，將唔會好似地球咁分佈於整個陰道，而係會於體內成為一團飄浮嘅液體。

圖片：Amazon Prime劇集 《Voyagers》

但更大嘅問題，或者係在於真正「碰撞」嘅時候。試幻想於無重力環境中要控制移動或停留本身就好困難，依家仲要你不停去撞另外一個人或者被撞，結果就係兩人會不停推開對方。所以必須要有外力——或者係太空船上常嘅魔術貼，又或者係如海豚一樣有第三者去幫手固定——先可以有效地活動。

既然雙人活動咁麻煩，單人活動又會唔會好啲？性用品品牌We-Vibe早前亦進行咗個研究，表示穿戴性玩具係非常適合太空中無重力、空間少、私隱度低嘅環境，而且只要連接技術可行，理論上太空人係能夠與身在地球嘅伴侶黎一場超遠距離性愛。或者會係太空性愛嘅一條可行之路？