雖然「道德」係人類嘅最高追求之一，但大家都知呢個世界就係有好多「不道德行為」。過往研究「不道德行為」時，大都會將其歸因於認知 (Cognitive) 或 文化層面，但據北美一個最新研究，其實人類體內嘅賀爾蒙都扮演一個重要嘅角色——具體黎講，就係體內睪酮水平較高嘅男士，會更易有所謂嘅「渣男 (Fuck Boy)」行為。

圖片：《Gossip Girl》

來自加拿大及美國嘅兩位學者 Nepomuceno及Stenstrom近日於《英國心理期刊》發佈一個研究。研究分別搵黎83及91名男女大學生，先用佢哋嘅口水去測量「基礎睪酮數值 (即正常休息時體內嘅畢酮水平)，然後再將男女各分為控制組及測試組。其中男女控制組要回答一啲關係家務嘅問題，而測試組就要回答對於「同性競爭 (Intrasexual Competition，即係兩個同性同時追求同一個異性，再簡單啲黎講，即係爭女/爭仔)」嘅睇法，另外亦要回答自己有幾願意去做「報稅時出古惑」、「與已婚異性發展婚外情」等「不道德行為」。

結果發現，只有喺男士身上、而且只限於「爭女」嘅情況，「高睪酮水平」與「不道德行為」係有正面關聯，亦即你睪酮水平越高，你就越願意喺爭女時作出「不道德行為」。另外研究團體亦透過「語文特性分析 (LIWC)」去分析受訪者回答時嘅用字，結果發現高睪酮水平嘅男士用字會更加「憤怒」，而「用字憤怒」本身又與「不道德爭女行為」有正面關係。「高睪酮」、「憤怒」、「不道德爭女」可謂環環相扣。

圖片：《Too Hot To Handle》

研究團隊指，過往已有研究指出「睪酮水平」與「尋求地位嘅動力」有正面關係，而佢哋今次嘅研究就係進一步發現高睪酮男士視「爭贏條女」為「有地位」嘅一種表現，而為咗「有地位」，佢哋就會更加憤怒，亦唔介意作出「不道德行為」黎達到目的。再換言之，與其話佢哋真係鍾意個女仔，倒不如話佢哋係為咗「爭贏」。

是次研究就冇探討到呢班「高睪酮水平男性」會點樣對待「爭返黎」嘅伴侶，但觀乎維基百科上對「Fuck Boy」嘅定義係「淨係諗住同條女上床而非有意長久發展關係嘅男仔」，似乎都幾符合「為咗爭贏條女又嬲又不道德」嘅人設。

資料來源：The association between testosterone and unethical behaviours, and the moderating role of intrasexual competition