「男人睇樣、女人睇錢」，幾乎係所有人對於兩性擇偶條件嘅共識，過往亦有研究證實咗呢個說法。而近日一個大型研究唔單止證實咗呢句說話嘅可靠性，仲帶出一個殘酷嘅現實——即使一男人係處於「平均水準」，佢都好大機會係冇咩人吼。

來自意大利Padova大學嘅Peter Jonason及英國Swansea大學嘅Andrew Thomas透過分析約會網站Spark Network Services上近200萬名會員嘅資料，試圖搵出經過多年演化而成嘅人類擇偶機制，於網上世界係點樣運作。佢哋分析每個會員於網站上收到嘅訊息、讚好等，將其演化為一個「感興趣指標 (Indicator of Interest, IOI)」，再分析每個會員嘅教育水平以及收入，去睇下IOI與會員嘅社會經濟條件之間有冇關係。

結果佢哋發現，高收入男士唔單止係受歡迎，而且幾乎係「受盡所有歡迎」。研究發現擁有碩士學位、年薪大約為7.6萬英鎊 (約HK$77.6萬) 嘅男性會員得到嘅平均IOI，比起「一般男士」 (大學學位、年薪3萬英鎊，約HK$30.6萬)高90%。研究員亦指出，高收入高學歷男士會員往往能夠得到數以百計嘅訊息，而其餘絕大部份會員只收到幾個、或者根本收唔到任何訊息。

而女性會員方面，雖然高學歷高收入嘅女性同樣比起「一般女性」更受歡迎，但相距只係40%。同時「一般女性 (同樣係大學學歷及年薪3萬英鎊) 平均能夠收到26個IOI，但「一般男性」就只能收到8個。換言之，雖然學歷與收入對男女黎講都係重要嘅擇偶條件，學歷與收入越高就越受異性歡迎，但女性明顯更為看重呢一方面，令佢哋嘅注意力非常集中於該群男士之上。

資料來源：PsyPost