自2016年「AV退役」後，上原亞衣一直都冇幕前性感演出，不過近日佢就重返東京著名脫衣舞場地「浅草ロック座」舉行20場脫衣舞表演，亦為此接受訪問。而由於近來日本演藝界被爆出多單「性傷害醜聞」，所以記者亦問上原亞衣嘅睇法，而上原亞衣就話：「冇聽過AV業界有咁嘅嘢呢」。

卻說當年上原亞衣AV退役時，亦曾於「浅草ロック座」舉行一連20場脫衣舞表演，當日更係場場爆滿。而今次再「復出」，亞衣BB就話係因為知道「浅草ロック座」近年經營非常困難，又覺得當日退役表演時「浅草ロック座」方面幫咗佢好多，加上佢希望自己每隔兩三年可以有話題性嘅作品，所以決定以「20代最後一次脫衣舞」回歸脫衣舞場，順手幫一幫「浅草ロック座」。

訪問中，記者亦以近來日本演藝圈嘅性醜聞，帶出亞衣BB離開AV業界後，業界近年嘅改變。首先亞衣BB就話「我認為AV界同演藝界中，明面同暗面嘅嘢係調轉嘅 (即係AV界表面好多「性」相關嘅嘢，背後其實大家都好正常；演藝界表面大家好正常，暗地裏有好多性醜聞)。至少就我知道嘅範圍內，從來都冇聽過、見過有性傷害——AV監督同演員嘅工作就係『性』，但『傷害』嗰部份就應該冇。」

另外亞衣BB亦指近年AV業界嘅操守越黎越好，過往常見嘅「強逼拍攝」已經不再存在。「依家如果女優唔鍾意套作品，作品拍完都唔可以拎出黎賣，而且簽約時要錄影亦已經成為慣例，所以變化好大。」

亞衣BB亦認為，大眾覺得「女仔肯剝衫就搵到錢」呢個想法係錯嘅，「我想化解呢個誤會，亦想提醒有意向女優發展嘅女仔。依家啲人個個都好可愛，已經唔係嗰個『年輕又好睇嘅女仔剝衫就會成功」嘅世界啦。」

而且佢提到，當過AV女優後的確好難回到正常生活，「我聽過好多人話好難搵工。即使依家有新法例，定明女優退役五年後可以要求下架所有作品，但呢種『電子紋身』依然好難消除。」

佢亦透露目前係靠過往嘅積蓄、投資以及經營YouTube等維持生活，未來有意到海外發展，甚至有移民嘅打算——唔知會唔會打算黎香港？

資料來源：Oricon News

圖片：ai_uehara_ex on IG