過去幾年，相信香港人非常明白「一切問題都係政治問題」呢句說話嘅含義，但你又有冇諗過，你嘅社會政治取向，與你於感情路上嘅成與敗有關？甚至只係啱啱被人拒絕或接受，都足以改變你嘅社會政治取向？

來自加拿大Nipissing大學嘅博士後研究員Francesca R. Luberti日前公佈一個研究，指出一個異性戀男士於感情路上受歡迎與否，原來係會影響到佢對於最低工資、健康福利等事件嘅睇法。Francesca搵黎237名單身異性戀澳洲成人男女，並要佢哋拍一段片去解釋自己點解係一個好嘅約會對象，然後指出佢哋會收到5名異性對段片嘅反應。但實際上啲「反應」其實係由演員預錄，並分為正面反應及負面反應兩種，而測試者會隨機收到由「全正面」到「全負面」嘅六種反應組合。換言之唔理測試者條片拍成點，佢哋都會被隨機分成「受歡迎 (多正面反應)」及「不受歡迎 (多負面反應)」兩組。

睇完啲反應後，測試者要再回答一份關於傳統性別角色、非正式性關係 (Casual Sex)、最低工資、健康福利，以及對於性及政治取向嘅問卷。

結果就發現，女性對於上述各種議題嘅取向，基本不受測試中獲得「受歡迎」或「不受歡迎」嘅反應影響，但男性就唔同講法。Francesca指出，獲得「不受歡迎反應」嘅男士，對於「非正式性關係 (Casual Sex)」嘅支持度，比起獲得「受歡迎反應」嘅男士為低；同時獲得「不受歡迎反應」嘅男士，佢哋嘅「正面情感」如開心、熱情、驕傲程度亦較低，較低嘅「正面情感」又會導致佢哋唔支持增加最低高資、醫療福利等。考慮到所有測試者收到嘅反應都係隨機而成，亦即無視測試者於現實生活嘅受歡迎程度，證明即使係近期嘅感情路上成敗，都足以 (透過影響心情) 影響佢哋對社會政治議題嘅睇法。

資料來源：Changes in Positive Affect Due to Popularity in an Experimental Dating Context Influence Some of Men’s, but Not Women’s, Socio-Political Attitudes