相信大家都有聽過「情人眼裏出西施」、「愛情令人盲目」等說話，簡單黎講就即係話人會因為感情因素嘅左右，而無法對愛人作出準確嘅評價，明明唔好嘅都睇成係好嘅。不過近日一個奧地利研究就指出，其實情人對於你嘅能力評價，比起親密朋友、普通朋友都要準確，甚至同你自己評價自己不相伯仲，證明愛情唔係盲目架！

《少林足球》

卻說來自奧地利Graz大學心理學系嘅研究團隊做咗個研究，佢哋搵黎238名年齡介乎18-45歲，至少拍緊六個月拖嘅人，並先要佢哋進行一個測量智力、創造力及情緒能力嘅測試，再要求研究對象本人、佢嘅另一半、佢嘅親密朋友以及一個普通朋友，去估呀研究對象嘅得分，從而得知佢哋對於研究對象嘅評價有幾準確。

結果，四個組別中估得最盡嘅當然就係本人。但有趣嘅係，研究發現大家都傾向低估自己嘅能力，唯獨數學能力大家就估得特別準確。

《鹿鼎記》

另一邊廂，另一半嘅估計準確度，就同自己估自己差唔多，而且比起親密朋友以及普通朋友都要準，證明另一半並唔會因為愛你而高估你嘅能力。而且另一半更能對研究對象嘅人際關係能力，作出頗為準確嘅評價，呢樣係親密朋友以及普通朋友都做唔到嘅。

不過研究亦寫到明，雖然自己評價自己，又或另一半、親密朋友對你嘅評價都「頗為準確」，但如果同正式嘅學術測試去比，其實都係「距離完美有段距離」。所以如果真係想知道自己嘅準確能力，都係要靠專業測試。

資料來源：Love is not blind: What romantic partners know about our abilities compared to ourselves, our close friends, and our acquaintances