近年唔少研究都指出，性生活其實係人體健康中嘅重要一環，生性活滿足、幸福，對於生理、心理健康都正面影響。咁你話如果唔滿足、或者你對性根本冇興趣又會點呢？根據日本一個研究，原來男人嘅早死機率，係同低性慾有關。換言之你性慾越低，就可能越容易早死。

是次研究係由日本山形大學進行。佢哋先係搵黎近21,000名40歲以上、過去六年間每年都有做身體檢查嘅山形縣民眾，要求佢哋填寫一份能夠評定個人性慾高低嘅問卷，幾年後再追蹤佢嘅健康近況，結果發現當中有503名民眾已經離世。之後研究團隊再比對離世者嘅性別、離世原因、當初嗰份「性慾高低問卷」嘅評分等，發現即使撇除年齡、不良嗜好、教育程度、婚姻狀況以至心理困擾等等因素，性慾較低嘅男性，不論癌症死亡率、定係全因死亡率，都比起性慾高嘅男性要高。換言之，男士性慾低，與死亡率有負面關連。而女性身上就搵唔到呢個關連。

但要留意嘅係，是次研究只係搵到「男士低性慾」與「高死亡率」之間有關連，但就唔知道兩者究竟邊個係因、邊個果，又或者兩者其實都係另一個未知原因所造成嘅後果。例如團體提出，「低性慾」同「高死亡率」可能都係「不良生活習慣」嘅結果。所以仲需要進一步研究，先能夠知道「低性慾」同「高死亡率」之間嘅因果關係。

資料來源：Association between lack of sexual interest and all-cause mortality in a Japanese general population: The Yamagata prospective observational study