喺呢人人都有智能電話嘅年代，唔少人都會隨手用照片紀錄生活細節，但一唔小心資料外洩，就會令自己嘅私生活，甚至性感照、裸照、性愛影片曝光於網絡之中。而近日美國國家兒童失蹤與受虐兒童援助中心，就同Meta以至Pornhub等網絡公司合作，推出專為未成年人士而設嘅「Take It Down」服務，以協助佢哋「回收」網絡上嘅流出照片或影片。

Take It Down嘅運作原理頗為簡單。未成年人透過其官網填寫簡單資料，然後提交認為有可能外洩於網絡嘅私密照，系統會於冇儲存實際影像嘅情況下，獲取照片或影片嘅獨立編碼，再將呢個有如手指摸一樣嘅獨立編碼，分享予有份參加計劃嘅企業，企業就會對照其平台上嘅內容，搵出相同或類近編碼嘅內容，再將其刪除，從而達到保護未成年人嘅效果。

值得一提嘅係，英國嘅慈善組織SWGfL早前亦推出咗一個原理、用法以至使用介面都與「Take It Down」非常相似，但針對成年人嘅服務「StopNCII」。

不過美國國家兒童失蹤與受虐兒童援助中心亦提醒，呢個方法並非完美，唔係話有咗「Take It Down」以及「StopNCII」，大家就可以隨時Send私密照，然後隨時收得返。首先，如果有人對原圖進行修改，例如改變圖像比例、大小，又或加上表情符號之類，照片嘅獨立編碼就會改變，企業就無辦法透過比對而搵出相關內容。同時，目前參加嘅企業僅為Meta (Facebook及Instagram)、OnlyFans、Yubo及Pornhub，換言之用家無辦法回收被發佈於Twitter或TikTok等其他平台嘅內容。另外假若私密照係透過有加密嘅通訊軟件，例如Whatsapp等傳送開去，即使企業有原圖嘅獨立編碼，都冇辦法攔截到相關內容。

換言之，Take It Down及StopNCII目前都只係「亡羊補牢」嘅方法，如果大家唔想自己嘅私密照被廣傳，最好嘅方法都係乾脆唔好影。