唔知大家身邊有冇個咁嘅朋友：佢未必好靚仔/靚女，但佢就成日都覺得有人追緊/Flirt緊佢，最後佢甚至會主動出擊，但結果往往都係表錯情尷尬收場？如果你身邊有啲咁嘅朋友，甚或你自己係個咁嘅人，咁你就要小心啲啦，因為據一個最新研究指，你好可能係唔識得分辦對方嘅表情究竟係開心定係不快！

據來自美國紐約Stony Brook大學心理學系嘅研究員Emily S. Bibby指，大學女生被性騷擾嘅次數，比起其他年齡嘅女性高3到4倍，而當中嘅「騷擾者」好多時都佢身邊嘅同學或者熟人，而背後嘅原因，似乎就係「騷擾者」錯誤解讀女生嘅面部表情，於是高估咗女生對佢嘅好感以及興趣，繼而做出錯誤嘅反應或行為。

而為咗驗證呢個假說，Emily先搵黎年齡介乎17至21歲嘅男女各30名，並要求佢哋進行模擬約會，並紀錄佢哋自己於約會展現出黎嘅好感程度、以及認為對方展現出黎嘅好感程度。研究員會拍低佢哋約會過程作為下一步研究嘅素材。

之後研究團隊搵黎另外219名年齡介乎18至21歲嘅美國年輕人，先要求佢哋觀看一大堆面部表情，並分辨出當中嘅情緒；然後就叫佢哋睇上一步研究中嘅約會片段，並要求佢哋估計片段中雙方展示出嘅好感度，以及佢哋對於影片中兩人嘅好感度。

結果就發現，如果第二步研究中嘅受訪者，對於影片中嘅人好感度較高，佢哋同時亦會高估影片中嘅人展示出黎嘅好感度。同時如果佢哋喺分辨表情時要花更多時間，又或將驚訝、嫌惡、憤怒等表情理解成開心嘅話，佢哋亦會大幅高估影片中人展示出黎嘅好感度。

換言之，如果你以為人哋對你好有好感又或調緊情，背後可能係因為你對佢本身就有感，又或你理解錯咗佢嘅表情，所以錯誤理解對方嘅反應。喺呢個「metoo」盛行嘅年代，大家都係保守啲好。

資料來源：Accurately detecting happy facial expressions associates with perceptions of flirtatiousness