事隔數十年，人類再次將眼光放向太空，而今次除咗有NASA嘅Artemis計劃準備再次登月、甚至登陸火星之外，仲有Jeff Bezos嘅Blue Origin以及Richard Branson嘅Virgin Galactic等「民用宇宙航空」。而正正就係呢啲「民用宇宙航空」令科學家提出警告，指不久嘅將來一定會有人於太空做愛，但人類目前對「太空做愛」嘅了解太少，必須儘快進行相關研究。

圖片：《Passenger》

由於早年嘅太空探索只限專業太空人參與，佢哋嘅專業性當然值得信賴，而NASA亦曾公開表示「無人曾於太空進行過性行為」。但隨住民用太空航行興起，幾乎可以肯定喺不久後嘅將來，就會有人締造呢項創舉。問題就係由於冇人試過於太空中做愛，所以亦冇人知道究竟真係做嘅話會發生咩事。

目前一切都只能透過理論層面去分析，例如科學家Lori Meggs就曾經撰寫報告，指出由於太空缺乏重力，體內血液會湧向心口及頭部，所以男性可能難以勃起；同樣係因為缺乏重力，所以伴侶雙方要維持緊貼、活動都會十分困難。

圖片：《The Expanse》

但來自英國頂級研究學院Cranfield大學生物分析科技系嘅教授David Cullen就表示，「點做愛」唔係重點，「做完會發生啲咩」先係。佢表示由於缺乏相關研究，所以目前唔知道人類胚胎於太空環境發展，會否引致發育問題；同時缺乏重力嘅環境，亦有可能加大孕婦宮外孕嘅風險。而雖然避孕措施理論上能夠防止以上情況，但地球上有用嘅避孕措施，去到太空仲有冇用又係冇人研究過。

雖然目前民用宇宙航空公司都明文禁止孕婦參加太空之旅，目前嘅「太空旅行」亦僅長數日，未必足夠精子及卵子結合再於太空發展成胚胎，但仍難以杜絕刻意隱瞞或當時人都唔知嘅懷孕情況。所以Cullen教授促請民用宇宙航空公司儘快進行相應研究，同時應向所有參加者解釋太空環境對母體及胎兒嘅潛在風險，甚至需要加入豁免條款，以防止公司負上法律責任。

資料來源：DailyMail