「蕾絲」呢種布料一直都被認為係女性專屬，如果係講「蕾絲內衣、內褲」就更加係男人們可遠觀、可褻玩，但一定唔會著上身嘅物品。但據日本內衣品牌「Wacol」近日接受訪問時指，原來「男裝蕾絲內褲」係佢哋當季最好賣嘅男裝產品，而著過嘅男士都話蕾絲內褲又通爽又舒服，試過就翻唔到轉頭喎！

雖然大部份人都知道Wacol係女性內衣褲品牌，但原來佢哋都有推出男裝系列，而當中除咗有常見嘅黑色棉質四角褲之外，更有近4,000Yen (約HK$215)一條嘅全蕾絲男裝四角內褲。品牌宣傳負責人「高橋優果」日前接受《TBS NEWS DIG》訪問時，就指「男裝蕾絲四角褲」係今季品牌男裝產品中最好賣嘅單品。而有購買嘅男客人就表示，蕾絲內褲非常通風，而且剪裁合身，不鬆不緊，一著就會上癮。有男性用家更係收到一條做禮物後，自己去買多幾條黎替換，證明蕾絲內褲有其吸引人之處。

而蕾絲內褲嘅背後，其實係有十幾年設計男裝內褲資歷嘅女設計師「稻積美紀」。據佢表示，男性下體經常都會出汗、黏膩，所以「蕾絲」其實係非常適合做男性內褲嘅布料。而為咗迎合男性使用情景，所以男裝蕾絲用上更粗、更結實嘅線，以減少不適及扯爛嘅情況。同時佢哋亦用上來自女性胸圍設計嘅立體剪裁技術，於男性內褲嘅前方部份造出空位，加強重要部位嘅包裹感及立體感。結果令男裝蕾絲四角褲大受歡迎，甚至出現供不應求嘅情況！唔知各位睇完報導，又會唔會想親身試下呢？

資料來源：Newsdig