「性」於日本係一個頗為矛盾嘅話題，佢哋會有合法嘅風俗區，亦會有國際聞及嘅成人影片業；但對性抱有非常保守、甚至放棄態度嘅亦大有人在。而跟據日本作家、評論家「牛窪恵」日前於《文春Online》上嘅撰文，日本年輕人對性嘅態度亦同樣兩極，兩極到有4成「20代」年輕人有「炮友」關係，但同時有4成30-35歲未婚男女為「零經驗」。

牛窪恵於文中表示，早前佢與團隊搵黎600名「20代」日本男女，並詢問佢哋是否曾與伴侶以外嘅人發生過性關係 (包括一夜情)，結果發現有40.2%男性及42.6%女性都表示曾經試過，似乎表示日本年輕人對「性」非常開放。牛窪恵指，目前19-28歲嘅日本「Z世代」身處一個頗為奇特嘅環境，一方面學校透過「不再男女分隊」等改變，向佢哋展示男女平等嘅觀念；但出到社會後卻面對多年來約定俗成嘅「男女定型」(「平時就話男女平等，一拍拖就話要『似返個女人』」)，於是部份人就決定脫離傳統嘅男女關係，追求「性自由」。

另一方面，網絡及社交媒體嘅盛行亦令年輕人輕易接觸到大量性資訊，部份年輕人因而對「性」產生嫌惡，又或覺得性愛「很麻煩」。結果就係日本高中生嘅性經驗率由2005嘅28%，減到2017年嘅16%。另一調查亦指出，日本30-34歲未婚者中，有過性經驗嘅男女分佔62.8%及55.6%，換言之男女各有近4成人去到「三字頭」都仲係「青頭」。

換言之，日本一部份年輕人對性越黎越開放，所以性經驗越來越多；另一部份年輕人就或主動、或被動地完全處於「市場」之外。牛窪恵指出呢種兩極化可能會造成兩個後果，第一就係日本嘅性病感染率可能會上升。其原因為嗰班堅持做足安全措施嘅「風險規避者」好可能就係對性較為保守嘅人，而當呢班人主動或被動地離開「市場」之後，就只剩返「唔會做安全措施」嘅「風險承擔者」，以及「對方想用就用，唔想用就唔用」嘅中立者，結果就係不安全性行為嘅增加。

兩極化嘅另一後果，就係結婚率下降。由於結婚雙方在意嘅係所謂「戀愛力」，而「戀愛力」本身就包含性愛經驗，換言之無性經驗嘅人好可能早早就排除在「可結婚對象」之外 (女性：「都成三十幾歲人，仲要我教呀？」)。

牛窪恵指出，或者當大家能夠將「愛情與婚姻」分開，「那未來選擇伴侶時或會更簡單、更有效率」。

資料來源：文春Online via Livedoor News