早幾日唔少媒體都引用「世界人口綜述 (World Population Review)」嘅數據，去討論「全球女性罩杯大小」。但其實「世界人口綜述」並非一個官方研究組織，而其數據其實都只係整合大家網上都搵得到嘅數據。好似所謂嘅「全球女性罩杯大小」，其實就係來自另一個網站「World Data」，同時「World Data」仲做過「全球男性JJ長度」嘅資料整合，咁不如就一次過同大家睇哂兩份數據啦。

先旨聲明，World Data嘅數據亦唔係第一手資料，而係整理其他研究嘅結果而成。好似「全球女性罩杯大小」中，主要資料就來自兩份2010及2013年做嘅研究，再間中以不同國家嘅研究作更新，所以就算唔理資料準確性，時效性都係大家要考慮嘅地方。而根據World Data整理出黎嘅資料，挪威女性以平均C至D Cup位居榜首，接下來則係冰島、盧森堡、美國、英國都有平均C Cup，而荷蘭、瑞典、哥倫比亞、委內瑞拉、丹麥等一眾國家就係B至C Cup。

圖片：截圖自World Data

而影響女性罩杯大小嘅其中一個重要因素，則是當地女性嘅平均BMI，極簡單理解即係「肥胖程度」。一般而言，成人嘅標準BMI應為18.5-24，但如果你由頭睇哂成個排行，就會發現第一個符合呢個標準嘅國家，係女性平均「只有」B Cup嘅瑞士，其餘平均有B Cup以上嘅國家，BMI都至少去到「過重」階段，「瘦底大波」似乎一件難以達成嘅事——唯獨日本例外！事關日本女性平均罩杯雖然只有「A-B Cup」，但平均BMI就係超低嘅「21.9」，難怪日本女仔身材咁好啦。

另外，數據中嘅罩杯係採用美國標準，量度方法為女性胸部最豐滿嘅胸圍 (你可以理解做「山頂)」，減去上胸圍 (「山腳」) 嘅差別，然後每一吋就係一個Cup (D同E之間多咗個DD Cup)。相信大家應該大概幻想到每個Cup實際係咩大小。

圖片：截圖自World Data

另外，World Data網頁中，其實都仲有個「全球男性JJ長度」數據，同樣係整合過往研究而成。當中位居榜首嘅係厄瓜多爾，平均長度有17.61cm，而且其男性平均身高僅為1.67m，換言之其JJ等如其身高超過10%，非常誇張。而突破16cm大關嘅仲有喀麥隆、波利維亞、蘇丹及海地等國家，香港就以11.19cm位於倒數第五，比泰國 (11.45cm)、馬來西亞 (11.49cm)、新加坡 (11.53cm) 台灣 (12.6cm)及中國 (13.07cm) 等都要短——即係平心而論，其實大家冇咩資格話香港女仔冇身材？

資料來源：World Data