4月嘅時候我同大家報導過全球首個「AI小姐」選美比賽「World AI Creator Awards（WAICA）」，事隔近三個月後，比賽結果終於出爐，前三甲分別來自北非國家摩洛哥、法國及葡萄牙，但單論外表嘅話，或者大家會認為亞軍更加靚女？

首先要提提大家，WAICA並唔係單純地鬥邊個能夠用AI生成最靚、最性感嘅女人，而係更靠攏傳統選美比賽，考美貌之餘再考智慧。比賽評分分成「美貌」、「科技」以及「社交媒體影響力」三個部份，「美貌」非常容易理解，「科技」就係指創作者利用「提示詞（Prompt）」指令AI生成圖片嘅技術，而「社交媒體影響力」就要AI美女回答問題以及同Fans互動。所以啲相靚並唔一定能夠奪冠。

好似奪得冠軍嘅摩洛哥佳麗Kenza Layli（創作者為Meriam Bessa）咁，喺佢嘅獲獎感言中表示：「非常感謝能有機會代表AI創作者，以及熱情地推廣AI的正面影響。成為AI小姐鼓勵我繼續推動AI發展。AI並不僅是工具，而是一種能夠改變業界、挑戰常規、創造前所無有機會的力量。」都可以話相當大方得體啦。

在 Instagram 查看這則貼文

World AI Creator Awards (WAICA)（@waicas）分享的貼文

至於來自法國、奪得亞軍嘅「Lalina」，相信就贏在創作者超強嘅AI生成技巧，因為淨係睇相根本就睇唔出佢係AI生成美女，無論佢嘅五官、體型、姿態，甚至後面嘅環境都堪稱完美無瑕，身材非常有料嘅佢亦相當符合一般人嘅審美觀。而第三名嘅「Olivia C.」就走一個時尚模特兒風格，瘦削身型加上紅髮、雀班亦另有一番味道。

資料來源：WAICA