有過床上經驗嘅男性都知道，做愛固然係充滿快感，但同時都可以係一個幾攰嘅運動黎。事實上過去唔少研究都曾證實過做愛對人體有各式各樣好處，近日一個中國研究就唔單止證明做愛有助減低年老後遇上心臟問題嘅機率，仲計埋個「最佳每年做愛次數」畀你，鍾意嘅話大家當KPI咁追都得呀！

一群來自中國青島大學附屬醫院心血管內科嘅研究人員，去年12月於《Journal of Scientific Reports》發表研究，指佢哋追蹤咗超過1.7萬名美國成年男性，於過去9年有關性生活、心臟健康情況以及壽命等資料後，發現做愛次數能夠有效預測個體嘅健康情況。具體而言，研究發現每年做愛不多於12次，即係平均一個月小於一次嘅男性，患上心臟疾病甚或早死嘅機率係最高；而隨住做愛次數越多，相關機率亦會慢慢降低，到每年52次至103次之間效果係最好，亦即一個禮拜一至兩次左右。

但就算大家精力充沛，都唔好以為做得越多就越健康喎。因為根據研究，做愛之所以能改善健康，係因為佢某程度上係一種帶氧運動，而帶氧運動帶來嘅好處，係會隨住次數、時數越長而慢慢減少，甚或會帶來壞處。所以佢哋認為一年多於365次，即係平均一日多於一次，就已經算係「做得太多」，對健康反而有害。

資料來源：The association of sexual frequency with cardiovascular diseases incidence and all-cause mortality