隨住越黎越多家電有上網、連接功能，網絡安全就唔再只屬於電腦、電話範疇嘅事，甚至一啲極為貼身嘅物品都有可能被駭客睇中。近來多個外媒就引用英國創新科技部於2023年年初發佈嘅報告，指出成人玩具其實都係被駭高危產品之一，而且造成嘅傷害好可能比你想像中大。

據《Forbes》報導，英國創新科技部於2023年發佈一份名為「消費性IoT產品所帶來的風險與心理傷害審查（A Review on the Risks and Psychological Harms Presented by Consumer IoT Products）」報告，當中詳述咗如小朋友玩具、健康健身產品，以至智能燈泡等IoT（物聯網）面對嘅網絡安全威脅，其中就將成人玩具都列入高危產品之一。

報告指市面上有唔少成人玩具都可以藍芽連接電話手機App，紀錄使用數據或作遙控使用，有時甚至能夠容許遠在他方嘅伴侶操控。問題係呢類連接通常都冇經過加密，所以非常容易就會被惡意第三方截止又或駭入操控。

你可能會話，成人玩具被駭好似都冇咩問題啫？但報告就指出，成人玩具嘅連接被駭後好可能對使用者嘅身心造成實質傷害。例如駭客可以操控成人玩具不斷運作令其過熱，造成燙傷甚至火災；又或如《Forbes》曾於2020年報導有人使用「遙控開關貞操帶」時因被駭而無法打開，最後要去急症室暴力開鎖。而且唔少有藍芽連接、遙控嘅成人玩具都會配一個手機App使用，而手機App入面又會有你嘅使用數據，換言之駭客能夠掌握你幾時用過等私隱訊息。

撰文嘅《Forbes》記者Davey Winder建議，大家於選購有藍芽、遙控功能嘅成人玩具前要三思，是否真係需要呢個功能。同時亦要及時更新手機App及手機作業系統版本，以儘量降低被駭嘅可能性。

資料來源：Forbes