不論男女，見到靚人自然就會望多幾眼。但你又有冇諗過究竟點先算係「靚人」？又或者更準確地問：一個人塊面上究竟邊啲部位好睇，先會被視為靚？近日一個美國研究就利用眼球追蹤技術，揭示究竟邊啲面部特徵對於「靚」黎講係最重要嘅。

圖片：ImageFX

以Forrest W. Fearington為首嘅一群美國明尼蘇達Mayo Clinic Alix大學研究團隊早前公佈一個新研究，以了解人類係點樣透過觀看面部特徵黎評定他人嘅吸引力。研究首先整理出一組40張、包括不同性別、年齡、種族，以及不同吸引度嘅正面照片，再搵黎154名成年受訪者去觀看呢40張相，並將受訪者分成「為相中人吸引力評分」、「尋找對方整容嘅痕跡」以及「冇任何任務」三組，並用眼球追蹤技術觀查受訪者實際上望緊邊個地方，以得知唔同目標之下嘅受訪者，於觀看照片會否注意不同部位。

結果首先發現，無論接到咩任務都好，所有受訪者都將大部份時間用於觀看相中人由眼、鼻、口組成嘅三角範圍之中。而且相中人嘅吸引度越高，受訪者觀看呢個範圍嘅時間就越長，顯示整體而言所謂「靚唔靚」就係取決於呢眼、鼻、口三個面部特徵。有趣嘅係研究亦發現如果相中人嘅吸引力低，受訪者會花較多時去觀看額頭或頸等邊緣位置，似乎顯示受訪者有「分心」嘅跡象。

圖片：ImageFX

另外值得一提嘅係，受訪者嘅性別，以及相中人嘅性別亦會影響觀看行為。研究發現當男性受訪者觀看女性相中人時，會花最多時間觀看嘴唇；而女性受訪者觀看男性相中人時，就會花最多時間觀看頭髮及眼睛。團隊指出呢個發現符合過去其他研究，即男性會於女性面上尋找「年輕、適合生育」嘅特徵，所以會留意皮膚狀態、嘴唇豐滿度等；而女性就希望尋找有關「可信度」或「地位」嘅特徵，所以會留意男性嘅眼神接觸以及打扮。

資料來源：Gaze Patterns During Evaluation of Facial Attractiveness: An Eye-Tracking Investigation