正所謂「民以食為天」，相信唔少人都將「食好西」定為自己嘅人生目標之一。而近日一個日本大學研究就發現，「食好西」原來唔單止會令你又飽又開心，原來仲會令大腦進入「覺醒」狀態，可能有助提高集中力、工作效率！換言之以後大家又多個理由追求美食啦！

圖片：Pakatuso

據日本《富士新聞網》報導，日本九州大學與企業「日冷」合作，進行一個「好味食物與腦電波之間關係」嘅研究。具體黎講，就係佢哋搵黎兩組參加者，一組食「好味炒飯」、另一組成「普通炒飯」，然後再透過測量腦電波斷定參加者食完飯後嘅大腦狀態。結果發現「好味炒飯」組食完之後腦部變得更專注，換言之「好味炒飯」的確能夠激發大腦嘅「覺醒狀態」。

圖片：Pakatuso

研究同時亦要求同一班參加者於其他日子分別試食「好味炒飯」以及「比較好味炒飯」（即係比普通炒飯好，但又無「好味炒飯」咁好食），然後再測量佢哋嘅腦電波。結果發現「比較好味炒飯」組嘅集中力一樣有所提升，只係提升量冇「好味炒飯」組咁多。換言之你食嘅嘢越好食，你嘅專注力、工作效率就會越高，甚至有可能對腦退化有所幫助。

值得一提嘅係，雖然研究係用「炒飯」，但具體結果就只係寫「好味嘅食物」，換言之係咪「炒飯」並不重要，只要好食就有用。但相信睇哂成個研究之後大家都會好想知，究竟嗰碟「好味炒飯」係有幾好味呢下？

資料來源：FNN