黎到2025年，AI都有埋啦，但如果男性想主動避孕，最簡單有效而且可逆轉嘅方法都仲係有170年歷史嘅安全套。不過黎緊呢個局面就有可能改變，事關史上第一款非賀爾蒙男用避孕藥早前通過第一階人體測試，有望於數年內正式上市，到時男性都可以分擔一下避孕責任啦。

示意圖

圖片：Pixabay

呢款目前測試中嘅藥物叫做「YCT-529」，其原理係透過抑制一種叫「視黃酸受體alpha」嘅蛋白，從而阻止睪丸製造精子。過去於雄性老鼠以及靈長類動物上嘅測試，均證實服食藥物二至四個星期之內，雄性製造嘅精子量就會大幅下降，因而達到99%避孕率——與此相比，即使正確使用，安全套嘅避孕率都只係98%。

同時研究亦發現於停藥之後嘅六到十五個星期內，精子嘅製造量就會回歸正常水平，而且於老鼠及靈長類身上無明顯副作用。顯示藥物安全得黎效果仲係可逆嘅。

圖片：Pixabay

而最新研究就進一步顯示服食「YCT-529」對人類嘅心率、睪酮等賀爾蒙嘅水平、性慾以至心情都無顯著影響，顯示藥物至少係安全嘅。而未來研究將會擴大規模，試圖進一步證實長期服用「YCT-529」對人體嘅影響。假若結果良好，咁「YCT-529」有望於未來數年內正式上市。

值得一提嘅係，目前有其他其他藥廠正在開發其他男用避孕藥，但當中唔少都用會影響服用者嘅賀爾蒙，換言之副作用應該會較大。至於究竟邊隻係最好嘅男性避孕藥，或者就要等到進一研究，或者上市後睇醫生嘅推薦啦。

資料來源：New York Post