講起「男人最痛」，相信「戴線帽」都一定名列前茅，而更痛嘅可能就係戴綠帽之餘仲要養埋人哋個仔。而有外媒報導指出，近年非洲國家烏干達有大量男士帶埋小朋友去做DNA親子鑑定，結果有98%結果都唔吻合，換言之當地有大量男人「被綠帽並兼養埋人哋個仔」。作為一個男人，睇到呢個消息真係有種兔死狐悲嘅感覺。

圖片：ImageFX

據《AP》報導，隨住國家經濟及技術發展，越來越多非洲國家開始引入DNA親子檢定服務，甚至仲有「公立」實驗室提供相對便宜嘅服務，例如烏干達內政部就有營運政府認證DNA鑑定實驗室。內政部表示近年越黎越多男人主動尋找親子DNA鑑定，但結果大多都「令人心碎」。政府發言人指出「黎做DNA鑑定嘅人中有95%都係男人，但98%鑑定結果都顯示佢唔係小朋友爸爸。」佢甚至呼籲國民要有「強大的心臟」先好黎做親子DNA鑑定，顯示「綠帽」情況非常普遍。

圖片：ImageFX

上述數字咁高嘅原因之一，係因為男人通常都係因為其他原因產生懷疑，先會去做親子鑑定，就好你係急先會行入廁所一樣。但事實上烏干達嘅不忠問題本身就已經非常嚴重。例如烏干達東部城市Nabumali嘅市長兼部落領袖Moses Kutoi，於接受《AP》訪問時就直言自己同老豆其實唔太似樣，而佢個仔又同佢唔太似樣，暗示祖孫三代可能無實際嘅血緣關係。Moses亦提到於非洲傳統中，「喺你屋企出世嘅，就係你嘅小朋友。」側面證明「養人哋個仔」嘅事一直存在，只係以前啲人無咁在意。

資料來源：AP