2024年時我曾經同大家報導過，日本北海道有個擁有4個老婆、於YouTube大拍一夫多妻生活片、被稱為「日本最強軟飯男」嘅YouTuber「渡部竜太」。不過據佢早前發佈嘅影片，佢嘅一夫多妻制家庭正式崩潰，三個老婆中有兩人離佢而去。但你唔好以為呢個荒謬嘅故事就此完結呀，因為「渡部竜太」指佢正開展「一夫多妻生活第2章」，仲公開招募新老婆加入，更荒謬嘅係真係有人報名。真係睇到人頭都痛埋。

渡部竜太（後排中）與「第一夫人 陽咲」（前排中）、「第二夫人 彩花」（右）及「第三夫人 千晴」(左)

左起：渡部竜太、「第一夫人 陽咲」、「第三夫人 千晴」、「第二夫人 彩花」

話說「渡部竜太」嘅YouTube頻道「一夫多妻ちゃんねる」於1月4日上傳一條名為「在鏡頭前宣佈『解散吧』。一夫多妻，崩潰的始末」嘅影片，影片中去年剛剛生下雙胞胎嘅「第三夫人 千晴」與「第一夫人 陽咲」都表示要離開家庭，只餘「第二夫人 彩花」願意留低。

而據「渡部竜太」早前接受《集英社Online》訪問時表示，條片本身係佢向三位夫人提出「擴展事業、增加收入」計劃嘅家庭會議。期間「渡部竜太」提出要於馬來西亞「建立拓展視野的冒險據點」，未來自己將會日本、馬來西亞兩邊走。此外「渡部竜太」亦指出去年因為要照顧啱啱出世嘅孖胎，無法進行「一夫多妻的活動」，所以打算往後將所有育兒工作交畀夫人們處理，並會為佢哋成立新YouTube頻道「單親媽媽互助會」，而佢自己就搵新歡繼續「一夫多妻」。仲話兩者相輔相成之下就可以創造收益，以用作各人生活及佢往返日、馬兩地嘅開銷。

如此荒謬嘅提議自然就引起夫人們嘅反對。其中「第三夫人 千晴」本身就面對生父「停止搞一夫多妻，否則斷絕關係」嘅壓力，再聽到個咁荒唐嘅計劃之後就立即宣佈要返娘家，而「第一夫人 陽咲」亦表示「如果千晴走我都走」，最後只餘「第二夫人 彩花」留底。本身嘅家庭會議影片亦變成依家嘅「解散」影片。

兩位夫人宣佈「退團」之後，「渡部竜太」一度要於零下7度嘅天氣下暫居於車上，目前戶口亦僅餘18萬Yen（約HKD$9000）存款，而且未來仲要為自己同「第二夫人 彩花」租新地方住。但「渡部竜太」仍然對未來嘅「一夫多妻」生活充滿信心，同時似乎亦無放棄要去馬來西亞發展嘅計劃。佢除咗表示下個月就會收到YouTube上嘅數百萬Yen分成，仲話自己早前於IG上公開招募新老浪已有進展，目前與四名日本女性聯絡中，好快就會正式見面，開展「一夫多妻生活」嘅第二章。

資料來源：集英社Online