成日話日本偶像女團末落，最直觀嘅就係睇下近年各個大型女團嘅退團人數，計落可能每個月都有一個。而最新加入呢個「前女團」大軍嘅，就有2月尾先從「日向坂46」畢業嘅「松田好花」。好在佢退團後立即就有新工作，似乎為佢嘅單飛之路寫咗個好開始。

現年26歲嘅「松田好花」3歲就開始學芭蕾舞、初中玩太鼓、高中時就入輕音部夾Band，可以話自細就同「唱跳」好有緣份。亦因為咁，所以2017年佢18歲時就參加「日向坂46」（當時仲係叫「けやき坂46」）嘅徵選並成功入圍，往後更參與過所有單曲及專輯，直到去年12月宣佈畢業，並於今年2月底完成第16隻單曲活動後正式單飛。

唔少女團成員單飛之後嘅發展都唔太順利，不過「松田好花」就似乎有個好開始。事關早前佢就宣佈會出演東京電視台5月播放嘅《架空名作劇場》，係佢首次主演日本地上波電視台嘅劇集，證明佢仍然有叫座力。同時佢於團體時期就有拍開寫真，仲出過實體寫真集，相信單飛之後都唔會錯過呢個衝人氣嘅機方法，大家可以期待下將來嘅新作啦！

IG：matsudakonoka.yahos