一日一啤酒越飲會越瘦？

文：MenClub 魏文青　　
POSTED ON 04 Dec 2019

啤酒呢家嘢係好多人嘅至愛，我甚至見過有人朝早8點搭車返緊工就已經飲緊。既定概念中啤酒不嬲都係有損健康，咁飲咗係咪一定冇益？根據英國《每日電訊報》引述嘅研究就話你知，飲咗其實健康啲！

但你又唔好咁快隊罐啤酒先！因為要健康，係要符合兩個條件，第一，啤酒必須經過二次發酵，例如大家好熟嘅比利時啤酒Hoegaarden、Westmalle Tripel及Echt Kriekenbier等等就係啦！呢類啤酒會於入樽後進行第二次發酵，而發酵過程中會產生一種獨得嘅酸(Acid)，能夠殺死對人體有害細菌。另外亦有研究指某啲啤酒含有大量益生菌(冇錯，同益X多一樣)，益生菌亦會幫忙殺死可能導致老人痴呆、腸癌嘅「壞細菌」，甚至能夠減少脂肪吸收、又或者令你好瞓啲。

要飲得健康嘅第二個條件就係份量，一日一杯啤酒基本已經足夠。但飲開酒嘅人都知好難淨係飲一杯，問題係飲得多、過多酒精累積於體內，對身體嘅影響一定更大。而且酒精本身亦會增加患上乳癌、中風、心臟或肝臟疾病嘅機會。所以小飲可以有益身心，大飲可能兩腳一伸。

咁Let Say你唔飲酒，但又想有呢啲益生菌咁可以點？專家就教你去食意大利菜，因為意大利菜常用嘅蒜、洋蔥、蘆筍同菜薊都有大量益生菌，食多啲一樣對身體有益——但個口氣就可能大啲咁囉。