【玻璃心？】車路士小將堅尼地辱華風波你點睇？

文：MenClub Mr.波特　　圖：互聯網
POSTED ON 27 Jul 2017


宜家7月份正值一眾歐洲球隊嘅休賽期，各支球隊都四出外訪，雖左踢表演賽搵真銀之外，佢地外訪踢波亦都為左喺其他地方進一步建立球隊嘅形象，令世界各地唔同嘅球迷認識佢地，從而增加支持者，其中就梗係包括作為黎緊一梯英超衝冕冠軍嘅車路士啦，之但係估唔到佢地今次外訪卻惹黎巨大嘅麻煩。

近日，車路士先喺北京同阿仙奴進行友誼賽，其後佢地將會飛到新加坡進行國際冠軍盃，其中佢地嘅對手分別係拜仁慕尼黑同埋國際米蘭。不過，就喺佢地以3：0大勝阿仙奴後，佢地陣中嘅小將堅尼地喺網上發表左兩段影片，其中都帶有辱華字句，好似「Porra China」，其中Porra就係葡萄牙文嘅粗口，因此隨即惹黎中國球迷炮轟，甚至有傳需要外交大臣進行調停，情況不可收拾。對於球迷反應激烈，車路士同堅尼地本人亦已經出黎進行公開道歉，並將涉事嘅堅尼地立刻送返英國，唔比佢參加之後個兩場熱身賽。不過亦有人指，Porra並一定解作粗口，只係因為翻譯問題而有誤會。

不過中國方面梗係唔賣帳，佢地嘅媒體就不斷抨擊堅尼地，認為佢毫無教養，又認為車路士管教球員不力，以後都唔需要車路士再黎中國踢球。好明顯，車路士將會因呢次事件損失唔少，其中最重要嘅一定係佢地喺中國嘅形象必定大幅下跌，甚至以後將減少邀請佢地到中國進行熱身賽，要知道中國宜家資金滿瀉，所有球隊都希望喺每年6-8月期間到中國大賺特賺。

雖然事件目前都未平息，但係車路士方面就完全無諗過放棄堅尼地呢位球員，佢地將堅尼地送返英國後，只係待事件慢慢丟淡，新球季佢仍然會喺車路士重點培訓嘅球員之一。

現年21歲嘅堅尼地係一名巴西兵，佢喺2015年由巴西球隊富明尼斯加入車路士，當時決定簽佢嘅係現時曼聯領隊摩連奴。而由於太年輕嘅關係，堅尼地目前都未可以重穩球隊嘅正選，岩岩一季更被外借至屈福特。但係由於受傷關係，最終佢只係代表左屈福特上陣1場比賽，並喺賽季中已經被送返車路士。

今次堅尼地喺網上嘅行為，其實喺言論自由非常開放嘅外國一啲都唔出奇，就好似美國總統亦經常被人喺網上攻擊及取笑，但係好似前總統奧巴馬就會以幽默嘅方式進行回應。今次一位只有21歲嘅小將可能只係貪玩喺網上簡單發佈左兩段影片，再加一兩個可能較為敏感嘅字眼，結果竟然換黎大篇幅以及窮追猛打嘅回應，作為一個擁有16億人嘅大國就唔可以大方啲唔好同佢計咩？點解一定要咁玻璃心，好似小學雞咁呢？唉.....真係無眼睇。