可能大家冇聽過「LADYBABY」呢隊偶像組合，但應該睇過都佢哋嘅成名之作「日本饅頭（ニッポン饅頭）」MV，內容講述2位可愛少女同一個打扮成女僕嘅鬍鬚佬喺日本街頭勁歌熱舞，當年更一度掀起模仿潮。不過未睇過嘅朋友都唔緊要，因為今日重點係「LADYBABY」其中一位可愛成員，樣子甜美兼身材火辣嘅「金子理江」。

今年23歲嘅「金子理江」，老豆係日本人，阿媽就係西班牙菲律賓混血兒，所以佢擁有三國血統。2014年以16歲之齡參加講談社試鏡活動「Miss iD 2015」奪得冠軍，隔年就同一樣係參賽者嘅「黒宮れい」，以及嚟自澳洲嘅鬍鬚佬「Ladybeard」組成偶像組合「LADYBABY」，憑著「日本饅頭」一曲一戰成名，嗰MV至今共錄得3,200多萬觀看次數。

「金子理江」喺18歲嗰年就推出首張寫真DVD進軍寫真界，雖然話就話係混血兒，但佢外表就生得非常清純甜美，並冇一般混血兒嗰種「鬼鬼哋」嘅感覺，身材又相當有料，不過佢產量就唔多，事業重心仍然係偶像工作。但隨住2016年「Ladybeard」離隊，組合人氣大不如前，最終喺上年正式解散，加上「金子理江」唔係成日玩社交媒體，所以都唔知佢最近忙緊咩，希望佢可以用另一種方式再次同大家見面。

資料來源：instagram@bite_me_3、twitter@bite_me__3