阿媽教落：「男人最緊要搵到份好工，女人最緊要搵到個搵到份好工嘅老公」，問題係大家對於「好工」嘅定義可能好唔同。就好似文青咁，份工係唔錯，但係啲女仔就成日覺得我份工太過正經、太有學術性咁，你話幾難做呢？

近日日本「Peachy」網站就針對女性的理想對象職業做咗個調查，發現其中最不受歡迎嘅十大職業，赫然就見到有機師同醫生呢兩大男人公認冇得輸嘅職業？究竟發生咩事？

第一位：飲食相關行業　(14.4%)

高工時、低人工、輪班工作，日本的飲食相關行業同香港嘅一樣，都有一種唔好嘅印象。受訪日本女士關心的除咗唔夠錢使之外，更加著重長工時同輪班工作會令到相處時間變得相當少。另外亦有受訪者覺得大部份從事飲食業嘅人(尤其男性)都有飲(醉)酒嘅習慣，所以都扣分咁話喎！

同票第二位：(12.4%)

醫生 

雖然醫生相當高人工，但與飲食業人士同樣面對超長工時同輪班工作，換言之與女伴嘅相處時間同樣罕有，如果真係建立家庭，有小朋友嘅話，女方就好可能要肩負大部份照顧家庭的責任。另一邊廂，醫生家庭亦予人「精英家族」嘅感覺，對於女性黎講亦係一種無形壓力。

髮型師

喺日本，髮型師不但係一種專業，更加係一個「時尚嘅象徵」，需要經常走在潮流嘅尖端。所以女性們會好怕被髮型師男友批判「Fashion嘅嘢你識條鐵咩！」之餘，亦都怕經常要與客人談天說地嘅男友即使收咗工都唔收口，周圍撩女仔！

第四位：老師 (10.9%)

作育英才、彬彬有禮，老師你哋又唔啱？冇錯，受訪者一係話佢哋經常擺出一副「世事都被我看透」嘅模樣、一係話佢哋思想狹窄又缺乏常識。更重要嘅係一個「盡責」嘅老師會以「教育下一代」為己任，將自身利益(即係溝女呀)放到好後，所以會冇時間陪女友喎…我都識唔少老師，佢哋都真係冇咩時間陪女友，但真係唔關「教育下一代」事架啵……

第五位：小企業老闆 (7.9%)

對男人黎講，一手一腳建立自己嘅事業真係幾浪漫，但女人就唔係咁諗。對於追求「穩定」嘅日本女性黎講，自己創業就即係會面對「一係富貴，一係閉翳」嘅豪賭，既無福利、亦無保障。再加上要創業就必須花上很多心力時間，又冇時間陪佢哋咁話。

其他排名：

第六位：機師(7.4%)

第七位：其他(6.9%)

第八位：IT相關

同步第九位：公務員、建築土木相關

總結黎講，日本女性就係希望男友份工係人工高、唔太忙、多時間陪佢、唔太識得多人但又唔太悶……其實唔單止啲女人呀，我都好想搵份咁嘅工呀！鬼唔知咩真係！