小時了了大未必佳？夏帆育成失敗！

文：MenClub 魏文青　　
POSTED ON 13 May 2015

由幾時會覺得自己好老？就係當你讀緊書時睇嘅童星已經長大到可以成為你條女嘅時候－－幾多歲嘅男人都鍾意後生女架啦，唔好扮啦－－而今次要講嘅，就係12歲就已經出道，到今年已經23歲嘅日本女星「夏帆」。

「夏帆」呢個名，文青細細個就聽過，亦都知道佢係一個日本童星演員，但對於佢嘅代表作，就唔知點解一套都講唔出。事實上由04年出道開始，夏帆出演過《在世界中心呼喚愛(電視劇)》、又出演過《女王的教室》，但都係飾演配角。而由佢擔正嘅劇集雖然亦唔少，但始終未能一炮而紅，以至咁多年，大家諗起夏帆都仲係諗起上面呢個樣。

但近年正式成人(於2013年滿21歲)嘅夏帆就開始轉戲路，先於《我們都是超能力者》飾演男人頭、經常飛踢露出小褲褲嘅「平野美由紀」，再於《世界奇妙物語》之中色誘香取慎悟，而且兩個角色都取得唔錯評價，算係轉型成功。但同時間，所謂歲月催人老，當年嘅清純小妹妹都開始「轉型」……

唔知係咪拍劇太辛苦，夏帆不單止冇咗當年份精靈，棚牙仲越生越哨，依家一笑個牙齦就走哂出黎。再加上佢一唔拍劇個打扮就錯得好交關，睇落成個三十歲嘅大嬸一樣。早幾日出席與綾瀨遙、長澤雅美及廣瀨玲合演嘅同名漫畫改篇作《海街Diary》記者會，飾演四姊妹中老三嘅夏帆一拍埋去，唔好話睇唔出佢仲係「二字頭」(綾瀨遙30歲，長澤正美都27歲)，佢呢個髮型再加個大紅唇妝，你話佢係綾瀨遙姑姐我都會信！難怪日本網友見到相之後正式宣佈「夏帆育成失敗！」。

夏帆育成失敗，咁呢啲我哋由細睇到佢大嘅童星又少一個！目前文青嘅唯一希望，就放哂喺志田未來身上啦！