雖然話「胸部充其量不過是屁股的山寨貨 (《監獄學園》)」，但男性、甚至唔少女性都對於女性嘅胸部非常著迷。但你又有冇發現，你同其他人對於胸部嘅審美標準有所不同？呢個世界上又有冇「客觀」地靚嘅胸部？

卻說一群來自紐約大學Langone醫療中心嘅研究員，為咗向整形醫生及病人提出一個「符合大眾審美標準嘅完美胸部」指引，所以進行咗一個研究。佢哋先搵黎25名曾經於2009至2019年間進行胸部整形手術、平均年齡47.4歲、胸部大小、形狀、膚色及乳頭、乳暈狀態各異嘅女性，並喺得到佢哋同意後為佢哋拍攝上身裸露嘅正面及側面照，再搵黎過千名受訪者 (過半為女性) 以5分滿分為25名病人嘅胸形評分。

結果就發現，25個胸部嘅平均分正正就係2.5，平均到冇得再平均；而透過比對不同胸部特徵以及得分後，亦搵唔到有任何特徵與得分有明顯關係。唯一一個比較有關嘅，就係胸部輪廓越隆起、越似一個球體就越高分。佢哋認為呢個結果就反映出大眾對於「完美胸部」嘅標準相當廣闊，各人口味不一，又或者覺得所有嘢都重要。

雖然以上好似係廢話，但研究員亦發現，25組胸部之中，有5組係特別高分。而透過分析呢5組胸部，佢哋就發現有「胸部輪廓隆起」、「上胸 (乳頭以上嘅部份) 豐滿」以及「較少下垂」嘅共同特質；而透過分析3D模型，亦發現有「兩邊乳頭之間嘅距離較短」、「兩邊胸部之間嘅距離較短」以及「乳頭與胸下緣 (即胸部下方與肋骨連接處) 距離較短」嘅等共通點。

不過研究團體就表示，佢哋唔係想為「完美胸部」劃下單一標準，只係想為整形醫生及病人提出佢哋可以注意嘅地方。同時佢哋亦指出今次研究無法反映 (同一胸形) 不同胸部大小嘅影響。所以最終結論都係「你哋鍾意就得」。咁唔知各位心目中嘅「完美胸部」又係點嘅呢？

資料來源：Aesthetic Characteristics of the Ideal Female Breast