我哋成日話日本演藝界人才輩出、競爭激烈，但對於日本經理人公司嚟講，要搵到個有才能、值得捧嘅新人，原來都需要通過一番競爭。好似我哋今晚要介紹嘅呢位「西本ヒカル」咁，當年自家鄉熊本縣上京後，一度獲得84間娛樂公司向佢招手！咁究竟佢係有咩咁吸引呢？

現年23歲嘅「西本ヒカル」從小於熊本縣長大，而且讀書成績相當好，本來可以進入推薦大學，按父母嘅期望成為一名公務員。不過高三時佢以高評價通過日本著名經理人公司Watanabe Entertainment嘅試鏡，隨後不顧家人反對獨自上京，以全額獎學金加入公司旗下嘅演藝大學「Watanabe Entertainment College」。估唔到佢入到演藝大學都依然係學霸，出色表演令佢畢業後同時獲得84間公司招手，當中不乏知名經理人公司，但佢就選擇加入一間新成立嘅公司。

或者就係因為公司太新，所以本來想作為演員活動嘅佢，於試鏡中不斷失利，於是毅然轉向寫真之路發展。結果寫真成績唔錯之餘，更為佢贏得戲劇嘅演出機會。

今年初佢轉投新經理人公司，成為著名寫真女星「熊田曜子」嘅師妹，明顯係繼續想喺寫真界發光發熱。佢亦表示一眾前輩嘅身材都係「瘦底胸大」，令佢有唔少壓力，但公司就叫佢放心，只要條腰唔變粗、個Pat Pat唔縮水就一定冇問題！咁講法，大家都知佢嘅賣點喺邊啦？

IG：hikaru_nishimoto1231