「七年之癢」呢句嘢大家都有聽過，但你又有冇諗點係七年，唔係六年、八年？坊間有指，人體細胞嘅代謝循環大概就係七年一次，換言之每七年你體內嘅所有細胞就會「換新」，你亦唔再係「七年前嗰個你」，對愛嘅感覺自然有所不同。以上說法當然就缺乏科學證據，但假若屬實，或者就能解釋到點解呢位「益田恵梨菜」隔咗七年之後又出黎影寫真？

現年28歲嘅「益田恵梨菜」，高中畢業後本來就做緊普通OL，但於2014年佢就突然決定參加《週刊Young Jump》舉辦嘅「Gal-Con」選美比賽，仲拎埋總冠軍而寫真出道，但僅僅活躍咗兩、三年就開始專心戲劇工作，雖然偶然會拍攝電子寫真集，但就未有再為雜誌拍攝水著寫真，直到今年初，佢又突然選擇為《週刊Playboy》及《週刊Spa！》先後拍攝寫真。甚至佢啲Fans都唔知佢原來可以咁性感。

另外，佢亦係演藝圈中有名嘅日本職棒球隊讀賣巨人嘅死忠Fans，死忠到《週刊Playboy》訪問佢都唔係講「點解返黎拍寫真」，而係講緊巨人隊佢最留意邊個球員。但訪問最後佢就提到，自己始終都係以出演電視節目、劇集為目標，換言之寫真未必係佢未來嘅工作重心，大家要睇佢嘅性感靚相就要把握機會啦！

IG：erina_msd