2021年九月時，我哋曾經同大家介紹過當時仲係寫真界新人嘅「吉澤遥奈」，仲佢當時「Miss Magazine 2022」亞軍嘅資歷，加上大家都有眼見嘅迷人身材、可愛臉蛋，理應可以成為各大青少年雜誌嘅封面常客。但結果對上一年，佢幾乎絕跡於寫真界，更曾一度打算搬回老家愛知縣，究竟發生咗啲咩事呢？

近日「吉澤遥奈」事隔一年再次接受《週刊Playboy》邀請拍攝寫真，訪問期間就問道，點解過去呢年都好少拍寫真呀？而「吉澤遥奈」就回答：「其實唔淨係寫真，其他工作都冇咩點接。」記者追問之下，佢就提到去年大學畢業時，曾經為未來嘅事業感到好苦惱，原因係要發展演藝事業就要長居東京，但來自愛知縣嘅佢覺得東京人多繁囂難以適應，甚至一度打算放棄事業搬回老家。好在最後佢自己諗通，認為就此放棄實在太可惜，所以先重新專注於演藝之路。

不過過去一年嘅苦惱都唔係冇好處。「吉澤遥奈」提到過去一年因為過得唔係太開心，所以體重下跌，神奇嘅係三圍數字就完全冇變，所以今次返出黎拍寫真身材變得更加好，仲被封為「神Body」之一。另外佢亦提到目前冇男朋友，未來希望可以搵個同爸爸一樣有禮貌而且脾氣好好嘅人。自問有呢啲特質嘅你！……今晚可以早啲瞓啦！

IG：__haruna0320