日本寫真市場競爭激烈，新人女星想要站穩陣腳又或推廣自己，已經唔可以單靠上雜誌、出寫真，所以近年唔少新人都會先開設個人YouTube，創作自家內容建立人設。而今晚要介紹呢位「そちお」大概就係想要一個「玩得夠放」嘅人設，因為佢個YouTube唔單止有「醉酒Q&A」，又走去跳笨豬跳，最近仲有條係玩「低周波震胸」，睇佢被人電到成個人抽下抽下咁，又真係幾有趣㗎！

「そちお」早於2021年就已經開設個人X (Twitter)，當時嘅佢仲係一個全職OL以及兼職寫真模特兒，即使經常發佈自己嘅性感照，但每個Post都只係幾十個讚好左右。其成名契機，係今年參加《Young Animal》舉行嘅「Miss Young Animal」寫真選美，結果獲得僅次於「冠軍」及「準冠軍」嘅「審查員特別賞」，亦令佢於11月尾推出首張寫真DVD，正式踏入寫真女星嘅行列。

「そちお」曾於訪問中表示，自己最滿意嘅身體部位，係「屁股到大腿」之間嘅線條，事實上佢亦的確擁有一對白滑豐滿嘅大腿，甚至連近日佢為《Young Animal》拍攝嘅寫真，都將重點放喺佢對腳到。而佢嘅另一賣點，大概就係玩得好放。好似佢自己嘅YouTube上，就有一條問答影片，每次答錯問題都要被低周波按摩器電個心口，由於低周波按摩器利用電流刺激肌肉，所以每次發動肌肉都會自動收縮，結果就係佢每次答錯，都被電到成個人抽下抽下，加上佢略帶痛苦嘅表情，非常容易令人想入非非。或者未來佢嘅寫真，都會走呢個「少少鹹多多趣」嘅風格？

IG：sochiosan