唔理你係相信呢個世界係公平嘅，定係單純地為咗平衡自己心理，反正唔少人都唔相信呢個世界有完美嘅人：生得靚嘅一定讀唔到書，書都讀到但運動一定唔叻，連運動都叻咁就一定性格好差！但今晚要介紹呢個「神谷明采」，就可能係最接近完美嘅人，事關佢靚得黎讀到書、事業有成之餘仲勇於發聲！

現年23歲嘅「神谷明采」，最早係於2020年時參加大學選美而成名，而佢間學校，正正就係日本「神校」東京大學！而且佢參加完Miss東大後，仲代表東大參加「Miss Campus Queen」，結果靚過哂其他日本女大學生奪得冠軍。2021年時參加日本媒體《Modelpress》舉行嘅「第一回學生主播大賽」，又拎到「Modelpress賞」，隨即與經理人公司簽約進軍娛樂圈，目前以模特兒及主持人工作為主。

睇到呢到你可能會話，「即係讀得書嘅靚女啫，香港都有麥明詩啦！」咁你就要睇埋落去啦！事關「神谷明采」一邊讀書、一邊做Model主持之外，2022年時仲創立製作低糖甜品嘅公司「SASA」以關注糖尿病，佢自己做公司代表兼公關，同年更曾去到英國參加One World舉行嘅世界年輕領袖峰會，用全英文發表演說！你睇，又靚，又東大，又主播，又自己搞公司，仲去到國際峰會發表演說，呢啲人存在喺個世界上公平咩？

唯一公平嘅，大概就係各位男士唔會理咁多，靚女我哋就睇架啦！你話係咪？

IG：asa_kamiya