俗語有云：「相由心生」；心理學上亦有所謂「光暈效應」，即係如果你對某人嘅局部印象良好，就會好自然地覺得佢其他嘢都係好嘅——點解我要喺「深夜系列」同大家講呢啲？事關今晚要介紹嘅呢位前主播「森香澄」有住非常甜美嘅外表，但就曾因為「毒舌」醜聞而令形象受損！

現年28歲嘅「森香澄」，2019年讀完大學後就加入東京電視台擔任主播，曾經憑其乖乖女甜美外表火速上位。但2020年時卻被日本傳媒爆出，佢與另一名女主播私下批評主播前輩，仲嘲諷電視台工作人員「污糟」、「像猴子一樣多毛」，而令其形象受損，最終慢慢淡出主播工作，去年3月時正式離開電視台。

但離開電視台後，佢好快就搵到新方向。自去年6月為《週刊Playboy》獻出寫真處女作之後，佢就頻頻登上各大日本雜誌，而且由於佢個樣男女通殺，所以唔單止係《週Play》、《Flash》、《Friday》等男性、大眾向雜誌，就連著名女性雜誌《An An》都搵佢影咗幾輯時尚與性感並重嘅寫真，人氣比起做主播時可以話係有增無減。

IG：mori_kasumi_