琴日（10月15日）乃係日本寫真女星「花井美理」嘅生日，而且唔係普通生日，而係「四十大壽」！而更早前嘅9月更係佢寫真出道21週年紀念。年屆40歲都Keep到呢個狀態、出道21年仍然屹立於業界之中，「花井美理」嘅外在內在其實都非常值得大家欣賞。尤其睇完佢5月時做嘅出道21週年訪問，我直頭係佩服佢添呀！

身高僅有147cm，但有住J Cup上圍嘅「花井美理」係於2003年4月，佢19歲就讀立教大學之初被星探發掘，繼而於當年9月，喺目前已停刊嘅男性向雜誌《COMIC MARUMAN》上寫真出道。據「花井美理」回憶，當時嘅佢其實非常內向，亦對加入娛樂圈冇任何興趣，只係因為當時需要賺生活費，所以先抱住「當做兩三年兼職」嘅心態入行。

怕醜又保守嘅佢，進入要著比堅尼示人嘅寫真界，當然會遇上各種水土不服。但偏偏佢又非常受歡迎，除咗寫真外仲有機會參加電視節目，結果就搞到佢壓力山大，經常於攝影棚影到喊。更慘嘅係當時嘅佢嘅經理人公司其實係想將佢推向成人業界，所以唔單止拍攝尺度越黎越大，更多次要求佢拍全裸寫真，好在「花井美理」多次堅拒先無成事。

大學畢業後因為遇上日本「就業冰河期」，所以佢只好全職投入演藝界。隨住工作機越黎越多，佢亦慢慢從中搵到樂趣。後來更成功離開原本嘅經理人公司，投入另一位於業界口碑良好，對佢亦照顧有加嘅新經理人門下。但當一切都看似走上正軌之時，新經理人竟然捲款潛逃，雖然「花井美理」嘅金錢損失不大，但被信任嘅人背叛再次打擊佢對人嘅信任，加上搵唔到與佢目標一致嘅經理人，所以自2009年起佢就以自由身方式繼續活動。

「花井美理」提到，佢深知難以單靠寫真活動為生，所以目前其實仲有兼職做緊辦公室工作——亦解釋咗點解近來有啲寫真係用OL裝扮登場。但佢同時亦提到雖然目前粉絲活動規模比以前小，但佢仍然非常珍惜與粉絲之間嘅關係。所以相信未來「花井美理」都會繼續於寫真界活動。

IG：miri_hanai_official