話就話日本女團嘅風頭近年不及韓國女團，但其實每一個做到偶像嘅女仔，都必定有一技之長，如果成功於大型團中立足，就更可能係週身刀添！好似今晚要介紹呢位來自日向坂46嘅「佐々木美玲」咁，就稱得上係多才多藝啦！

上個星期啱啱過25歲生日嘅「佐々木美玲」，早於2016年就加入當時仲係叫「けやき坂46」嘅「日向坂46」，目前除咗係團內僅存嘅五位「一期生」之外，亦係團內少有於千禧年前出世嘅成員。換言之佢不論年齡定資歷，於團內都已經大師姐級數，不僅成為團內擔任Centre位置次數第二，更於2020至2021年間，創以個人身份一年內參加77次電視節目嘅紀錄。絕對係團內嘅台柱級人馬！

除咗唱歌跳舞以至節目表現都了得之外，「佐々木美玲」亦擁有相當多個人技藝。例如佢細個時就學過鋼琴同小提琴，大過就自學結他；又因為年少時曾經同家人一齊於台灣居住4年，所以識講中文；又因為全家人都鍾意出海釣魚、潛水嘅關係，所以冇車牌嘅佢今年又考咗個二級小型船牌。唯一比較可惜嘅，係因為佢走清純路線，所以未有機會展現大家最睇重嘅「身材」，希望將來有機會啦！

IG：mireisasaki_official